نادوا على سلطان العروبة بعد ميّة عام
لمين حصّلت المجد ورفعت راس الشّام
هذا جزاؤك عَـ الفضل يا بو طلال وذكرى لثورتك يا عالي المقام
ما هان عليك بعروبتك حكم الغريب وما قِبْلتْ كرامتك يحتلّك غصيب
يمكن بدافع نخوتك مكتوبلك نصيب تدحَر الطّغيان الغزاة اللِّئام
قائد الثّورة بحزم وإصرار حرّرت البلاد بهمّة رجال العزم عليهم اعتماد
بتشهد نجوم اللّيل وليالي السّواد شو سَطّر التّاريخ تذكّروا يا شوام
وين الوفا يا بلد ما حملت جميل بعد القهر والجلد وسنين الدّخيل
عشر سنوات انبعد قضاهم رحيل الصّادق لمّا وعد التزم الكلام
يا حيف على بَشر بتتجاهل شو صار
كُبرَ المواقف نَكر ما قدّر الثّوار
بالعمى طيّشو عَكر ناسي حماة الدار
فيّق ناقوس الخَطر تَيِسمعو النّوَام
نحنا قلال العدد بالصّدق مشهورين
بنزرع بعقل الولد درب التّقى والدّين
نعبد إلهٍ أحد عليه متّكلين
وعلى الخمسة المعتمد والعدّة السعيدة بالتّمام
يا جبل عالي ما يهزك ريح صيتك سكن الأعالي والاسم المليح
ضَحّى بدم الغوالي وبْاِحْسَاسو جَريح من كلّ جاحد ضلالي وعلى المحاكم ملام
يا ظالم يا غدّار توقّع بجيك اليوم من ربك القدّار العالم بسرّك دوم
إصحى من المكّار ولا تكتفي باللّوم قلبو إنكوى بالنّار ما عاد جفنو ينام
لعنة من العادل ومن حاصي الأنفاس
ونقمة من الفاضل على الحاقد الدّساس
ومِحنة على الفاعل بالسّقم والوسواس
لمّا الخصم غافل شو مخبيّة الأيّام
نحنا نفس وحدة بأجسام مختلفة
بتلمّنا الوحدة بالغيرة والالفة
اصواتنا رعدة الوقفات معترفة
بالسّلم والشّدّة وشيوخنا أعلام
